棋哥燒鵝餐室

Open Now

Now Closed

約左友人去天后行街，經過見到間餐廳好多人排隊，原來係食燒味，橫掂唔知食咩，我地都唔執輸排埋一份。燒鵝燒得好靚，色澤均勻。我地幾個叫左個二人餐同一個燒腩仔飯。蜜汁叉燒 - 好入味，就算係瘦肉部分都唔會乾巴巴。而肥膏方面又唔會食到成口油淋淋，油脂分佈剛剛好。誠意推介！例牌燒鵝 - 好好彩，俾左隻燒鵝脾我地。外皮燒得香脆，肉質嫩滑，好啱送飯。燒腩仔飯又係冇得頂，外皮好脆，再點黃芥末，送一口飯，真係好正！二人套餐跟餐有兩個主食，分別叫左米粉同瀨粉。清清地，食完燒鵝同叉燒滯滯地食啖麵解膩。唔止遊客，都有唔少街坊食，燒味真係唔錯，抵佢咁多人食！