開餐達人

Open Now

Now Closed

午飯無心水，周圍蕩緊之際，突然有個朦面阿姐派傳單，咁神秘 ？非也，其實包到實應該係天口興，免得曬親啫 😂接過傳單，原來係午市平三蚊 coupon, 開餐達人，個名有D騎呢 😂見D餐價錢都幾合理，試吓啦⋯⋯然後阿姐會帶我地上一層，再轉幾個彎，就見到了，果然夠神秘喎！枱面有鬥獸棋的紙，好懷舊呀！等食可以捉返局嗎？餐牌同樓下的相約，大約五十蚊一個餐。食左日式叉燒煎雞豬骨濃湯稻庭烏冬 $53 ，個名真係水蛇咁長，而碗野呢，又真係俾足咁多料，絕不欺場 。煎雞大大件，都有四舊，香口。日式叉燒又起碼四大件，厚及肥。個碗好深，有無數的紫菜、煎翠玉瓜、粟米，烏冬堅係稻庭的，夠軟滑。不過...... 由於餸多，而且全部都用油煎過，碗野真係越食肥膩，好滯 。食左一半到就要收手了，否則應該全日都會頂住。好彩叫左杯檸水消吓滯。咁多餸，價錢來講係抵。見隔離D食肉獸同大食仔都食得好滋味，但我就唔太啱食了。仲有其他好處係都夠好坐，多野玩。而且午飯時間冇趕客，觀塘來講都算難得。如果可以改善吓，小D油，就正了。