Yadllie Plate 야들리애플래이트 (兆萬中心)

兆萬中心除咗食放題之外，仲開咗間食傳統道地韓式炸雞嘅舖頭，肥雞梗係要去試吓啦。炸雞方面，肥雞試咗兩款口味，第一款係大邱辣醬，第二係蜜糖乳酪炸雞，想講佢嘅辣醬炸雞真係幾辣，唔似以往為咗符合香港人口味嘅甜辣醬，肥雞覺得幾有驚喜。佢嘅八爪魚煎餅，非常之足料，啲八爪魚落得好重手，個餅底亦都煎到非常香脆，真心唔錯。佢嘅芝士蟹籽蛋卷，入面嘅芝士係可以拉絲，配埋脆卜卜嘅蟹籽，食落口嘅感覺好正。天氣凍，梗係食多個部隊鍋，肥雞嗌咗玫瑰牛肉部隊鍋，佢嘅牛肉係偏牛肉碎，但係牛味幾重，入邊有好多料，有年糕，蔥絲，午餐肉，腸仔，肥雞仲加多咗個麵，食完呢餐真係捧住個肚走。