京都勝牛 (Tower 535) (Closed)

我諗平時啲人黎食野都係食牛，食豬既應該唔多。今日就黎睇睇係咪都咁好食。入到坐見到座位旁邊其實有醬料。包括沙律醬、蒜蓉醬，同燒汁。我就選擇左餐牌上面嘅鮮嫩脆炸豬柳伴鰻魚套餐。同時點咗黑松露薯條。套餐中包沙律同埋飯，仲有麵豉湯，而且呢三樣嘢仲可以無限添加。鰻魚以豎起嘅方式擺喺豬柳旁邊。旁邊有個裝芝麻碎嘅碗，當中要倒落燒汁，再磨爛啲芝麻。沙律係普通嘅椰菜絲，淋上芝麻醬，就係好味嘅椰菜沙律。小菜係醃咗嘅酸味白蘿蔔，食落去都幾開胃。麵豉湯其實偏鹹，入面有適量嘅蔥花同埋腐皮圈。鰻魚其實炸到仲有少少魚腥味。當中嘅炸粉好似落得比較厚。點上燒汁咁啱可以遮蓋到魚腥味。炸豬扒其實有黃芥末醬喺旁邊。我就認為炸豬扒點上黃芥末醬係比燒汁更加好食。炸豬扒嘅肉質係好鬆軟。炸粉唔算厚身，一咬落去啖啖都係肉。黑松露薯條其實當中嘅黑松露都幾少、大部份都係鹽嘅鹹味。形狀睇落去似係麥當勞嘅薯條，但其實比麥當勞嘅薯條更加鬆脆。薯條碟邊有沙律醬跟住隔離仲有茄汁。其實餐廳可以比黑松露醬會更加好。唔似係黑松露薯條，反而似係普通嘅炸薯條。整體來講，環境格調算係唔錯，冇預約都唔需要等位。性價比唔算高，間唔中食返次都可以話係對自己嘅一個獎勵