顏府御膳 (Closed)

對自己好啲，不如食精緻中菜啦！不過晚市食精緻中菜通常都比較貴，所以我哋選擇午市嚟到銅鑼灣嘅顏府御膳。呢度嘅午市套餐有齊前菜、湯、主菜同糖水，價錢唔貴又見得人，真係嚟個lunch business meeting都得。老火湯今日嘅湯係雪梨紅蘿蔔煲豬骨湯，勁足料好鮮甜，完全無味精，係屋企嘅原味道。口水雞呢度嘅口水雞係預先起骨，製成雞絲，食得夠晒方便之餘，仲好入味；記住加埋青瓜一齊食，咁就更加有口感。味道方面唔算太辣，少少麻，味道好有層次。紅椒汁蘆筍蝦餃另一個前菜選擇咗紅椒汁露筍蝦餃，由於外皮用紅椒汁製作，賣相呈橙紅色，非常吸引，而食落仲有少少嘅紅椒鮮甜味道。蝦仁同蘆筍帶嚟double爽脆感，非常彈牙。野菌燒汁和牛主菜方面就揀咗和牛，估唔到和牛份量都唔少，牛肉味超香濃，加上燒汁就更加惹味。涼瓜豉蒜炆頭腩頭腩啖啖肉，魚肉嫩滑，蒜頭豆豉勁入味，用嚟送飯真係一流！南北杏雪耳燉萬壽果糖水方面，萬壽果非常清甜，加入冰糖、南北杏同雪耳，夠晒潤肺潤喉，啱晒轉天氣嘅時間享用。（記住Like同Share畀朋友）By A姐M佬 玩樂日記