赤橋拉麵 (Closed)

因有朋友係紅橋開補習社，佢平日走過經常見到哩間拉麵店門口排晒隊，哩次決定就去試下。星期六中午11:30已經去到，原來哩間拉麵店中午12:00先營業！前面都已經有7個人排緊隊，我心諗有冇咁犀利呀！咁我就比少少耐性去等啦，12點到啦就見到個男人行緊來拉開門講左句經常係日本餐廳會聽到日文：歡迎光臨！朋友話哩間鋪係真係日本人開架！內心打左凸！紅橋稀少人煙的地方竟然吸引到外來人開鋪？就算開應該開係新墟啦！人多呀嘛！好啦廢話講左，係時候入鋪食拉麵！我嗌左黑油豚骨沾麵，朋友就嗌左海老豚骨沾麵！估唔到的麵要即刻整，如是者等左15分鐘，終於等到兩位主角出場！黑油豚骨沾麵：麵有韌度有咬口，唔會淋，湯係濃湯但我覺得偏咸唔覺有黑油味道，整體上湯配落麵到係夾到，不過不失！海老豚骨沾麵：就偷左幾啖湯來試，湯一樣濃湯，反而哩個湯食得出蝦味，有少少分加！兩款沾麵基本一樣配上叉燒，流心蛋，竹筍，紫菜。叉燒比出面拉麵鋪大塊而厚身少少，咬落去幾有肉感。蛋就失望唔夠溏心。竹筍同紫菜一般貨式。食完成碗沾麵都幾飽下！一間小店做到咁樣質素不過不失。紅橋特色小店能唔能生存好難講。