小雲川 (Closed)

星期日又撞正數字屋做梗周年大優惠，我呢個師奶當然要去血拼，但係血拼前當然要食飽飽先得啦。老公話佢公司附近有間新店，食米線同肉燥飯，好，就去試試吧！餐廳係先達附近，店內光鮮，潔白。除左白色做主色，椅桌都係用上青色同藍色為主，好乾淨又舒服。店內選擇唔多，我叫左個招牌腩肉米線加小雲卷（$36+7）配清湯，碗米線既配菜都唔少，有蘿蔔，芽菜，酸菜，豆卜，個豆卜食落好新鮮豆味又香濃。不過個酸菜就太酸了！蘿蔔無根既，而且都好甜，個清湯唔油，又唔會好味精，好易入口，個腩肉就比較瘦仲有d似叉燒，加配既小雲卷得一條，好香脆，腐皮包住魚肉黎炸，都幾好味！一口小雲吞（$25），一碟有5隻，睇落炸到好啡，不過食落好脆，好好味，而入面既肉又唔肥，食完好想叫多碟。新店做到呢條水準已經好好！