隠家拉麵工場 (Closed)

呢間深水埗嘅拉麵真係夠哂隱世，因為佢位於西九龍中心嘅蘋果商場入面，而蘋果商場係賣雜貨嘅地方，又點估到深處有間咁好食嘅拉麵呢！食開深水埗美食嘅我就當然知道呢間隱家拉麵工場啦！以前食開隱世白伝，今日決定食新口味！隱世黑伝 : 聽個名就知係黑蒜油嘅湯底，重口味人士必點！除左好似一般沾麵舖有好重黑蒜嘅味道外，佢仲有好重嘅芝麻香味，成為佢與眾不同嘅特色。隱世赤伝 :蕃茄同辣呢個組合一直係絕配。呢個沾麵主打蕃茄湯底，加上少少辣味，將蕃茄湯同埋豬骨，豬肉，叉燒嘅味道帶出一個新嘅層次。如果你係鍾意番茄湯底的話，呢一個番茄湯底嘅沾麵絕對適合你。至於佢嘅叉燒同埋拉麵都係水準之上，叉燒煮得入味，肥瘦適中，拉麵亦保持彈牙，粗嘅拉麵掛湯能力好高，啖啖都食到濃郁嘅蕃茄味。喺香港食過咁多拉麵沾面，都好少食到一個番茄湯底咁濃郁但無味精感嘅沾面，呢個沾面俾到人驚喜呢！最鐘意呢間沾麵水準高但位置夠隱蔽，唔會好似鬧市旺區嘅拉麵舖成日大排長龍，真係排到飽都未有得食，所以呢間沾麵大推！