杏甜品 (香檳大廈) (Closed)

假日同朋友四處shopping, 記得之前食過Almond Dessert, 好味令人印象深刻, 今日帶朋友去嘆下甜品chill下。由加拿分道入口, 直上一條樓梯, 乾淨企理粉綠色主調環境, 非常適合三五知己圍埋一齊閒聊食糖水。中西式糖水都有供應, 我地揀咗兩款椰皇雙皮奶, 配唔同配料, 另外追加咗一款水果。椰皇貓山皇燉雙皮奶 HK$75送上檯時冇預期散發榴槤氣味, 所以唔擔心影響身邊唔食榴槤嘅朋友。凍嘅貓山皇蓉浸於面層嘅香滑鮮奶, 底層為固體雙皮奶, 每啖充滿淡淡奶香, 滲咗少少鮮奶入貓山皇蓉, 有奶香之餘, 更有陣陣榴槤嘅果香清甜, 最後刮埋椰皇內壁少少椰肉食, 正。  不過 +$15 追加併蜜瓜就有d surprise, 份量極少, 不值得追加。椰皇桃膠燉雙皮奶 HK$67同樣有鮮奶同埋底層雙皮奶, 甜甜地又有層次感嘅桃膠, 養顏又滿足。呂宋芒小丸子杏仁茶吸吸 HK$55本身自己好抗拒杏仁果隻味, 但呢度嘅杏仁茶易入口, 而且香滑。小丸子少少甜, 熟透帶微微煙韌, 間中啜到清甜嘅芒果肉。