鳴虎 (北帝街) (Closed)

土瓜灣都算係一個幾特別既地方，近住13街，食物方面真係差小小，行遠小小，黎到北帝街呢邊就比較多選擇，但今次有拉麵店真係比較小見，等左好耐，終於都開張啦，即刻去試下先啦。舖仔細細，都冇計既，土瓜灣地方真係唔大，入面放到幾枱！不過都坐得幾舒服。餐牌同好多拉麵店都一樣，幾款拉麵選擇，跟住可以加小食同飲品。男朋友就叫左個黑嗚虎，佢個湯底係用黑蒜油，墨魚汁，豬骨湯做出黎既，初時我以為黑蒜油會蓋過墨魚汁既味，好彩地黑蒜油唔會太濃，反應令到墨魚汁既味更加特出！！呢個拉麵湯底都幾特別！另外叫多個小食，嗚虎炸雞！呢個價錢有咁多舊都真係抵喎，平時呢Ｄ價都只係兩舊，呢間有５舊！炸得非常好味，外脆內嫩，好難明白點解可以個皮咁脆，但入面個雞肉又嫩又多汁！非常利害，重點推薦！！我就叫呢個嗚海老，睇落金黃色都知蝦膏一樣好足，當中佢地用左香味油，蝦味噌同豬骨湯去製造出黎，蝦味都ok，唔會太重味傷到喉嚨。糖心蛋好入味，中間糖心真係非常之糖，放水唔會溶，食落又可以流心感覺！總括黎講都幾好，下次都可以帶朋友黎食。