越南米紙 (Closed)

呢間舖裝修時都有經過下留意過，早幾日見佢啱啱開咗，就入去食個早餐先返工。入面地方不大，但環境幾好，坐咗個可以望街嘅位，光猛又舒服。除咗普通早餐，仲有越南湯河、越南麵包等越式早餐。跟餐可以6折轉特飲，特飲種類都幾多。叫咗個早餐中經典中嘅經典──沙爹牛肉麵～個麵沙爹醬香濃，仲加多咗香葉，多咗幾番東南亞風味 而跟餐仲有炒滑蛋、麵包、沙律菜。炒滑蛋好滑，而麵包就有得揀牛油多士或者Panini長麵包，我就叫咗個長麵包（其實我都唔知咩係Panini，但好過次次都食多士咁悶）；個長麵包又有驚喜wor！睇落似一個白色嘅熱狗包，入口鬆化，可以搽牛油，有少少似餐包，不過冇餐包咁甜，個人幾鍾意呢款包～此外，早餐難得跟沙律，有啲菜食，甜甜酸酸嘅蘿蔔絲、菜絲，清新又開胃，幫助消化。早餐質素唔錯，下次有機會再嚟試下午餐晚餐！