吉野家 (台山中心)

Open Now

Now Closed

我有個舊老友，我叫佢做「爸爸」，因為我跟佢個仔一樣咁嗌佢。今日，爸爸約我1:30到灣仔新景園食lunch。今日中午出面好曬好熱，爸爸玩遲到，害我喺餐廳外面乾煎！佢黎到之後，又改變主意，話想食附近間吉野家，因為佢嫌新景園冷氣吾夠，而吉野家冷夠哂「痕」。又好！我都好耐無食吉仔了。我叫咗大牛加蛋，再配凍鮮檸。其實吉野家嘅水準都好平均，仲有咩特別呢？我仲記得，盤古初開嘅時候，吉仔嘅飯係日本珍珠米，牛肉堅係鋪滿成個碗兩次。但係，我肯定依家係賣緊泰國香米，牛肉已經少咗勁多。想食多d野嘅話，或者好似我咁，加隻温泉蛋。我同爸爸喺吉仔食晏，令我諗起以前一齊做野嘅回憶。果陣時每朝早，我同佢無約定，但係會一齊喺呢間吉仔食早餐，食完早餐一齊上番公司「搏殺」，因為果時佢就黎要調走，好多手尾要處理。晏就我哋就一齊跑步，跑完買吉仔外賣番公司食......一餐吉仔，睇到味道會變，事物會變，人亦都會變。依家同爸爸分開咗工作，無幾可會聚舊。但我希望，無論外面點變，我哋嘅友誼不變。