台灣郎 (Closed)

好友從外地回港探親，成班朋友出嚟飯局，想揾個坐得舒舒服服又夠靜局嘅地方聚腳，於是揀咗天后銀幕街嘅台灣郎。小館子地方細細，但佈置極有特色，仲設有樓上雅座㖭。嚟到台灣小館，梗係要叫番碗牛肉麵試吓。麵一上枱，啖湯香味濃郁，牛肉鬆軟入味，紅、白蘿蔔炆得啱啱好，麵質柔韌有咬口，上佳之作。👍跟住嚟個高雄夜市蚵仔煎，但呢度嘅做法一D都唔台式，因為台灣蚵仔煎會落好多太白粉，呢度冇，反而有D似傳統潮式做法，不過味道不俗。熱辣辣嘅古早味三杯鷄，幾惹味，不過鷄唔夠滑，乾咗啲。炒時蔬，比較一般。最後到嘅鹵水拼盆，有鷄翼、豆腐、鹵水蛋，豬腸同鹵肉，不過不失。整體而言，地方別緻舒適，食物亦不俗，不過份量偏少。如果係食量較大嘅男士，就要叫多幾款。計埋條数，就唔算抵食。