囍雲天酒家 (Closed)

apm排隊撘轆上茶樓勁長龍，於是去左較遠嘅囍雲天，有報章寫呢度用地溝油……門口有告氏澄清左，話唔只一間供應商，咁事實係點就唔知，不過唔知係咪因為咁而受影響，入到去得一半客，勁多吉位，鐘意坐邊都得。原來已經到左下午茶時段，有好多款特價點心，叫左幾樣大路野。煎餃子，皮厚，入面啲餡有啲似鹹水角，感覺奇怪。鷄包仔，肉嫩多薑絲，正。鮮蝦菜苗餃，菜苗新鮮，皮韌，好味。牛肉球，大大粒，多馬碲芫茜，正。綿花鷄，鷄好大件又大肥，成層肥膏令人卻步，其他料幾好，入味。鐵觀音茶香，水滾，嘆返杯茶去油膩，唔錯。唔知點解無乜客，侍應主動執碟沖茶，服務唔錯。坐位闊落又唔使等，行遠啲都抵。