拉麵凪 (Closed)

老板、店員都好熱情，認真介紹咗餐牌、食材，同埋推介款式，上菜之後主動提供圍裙，見我哋影相影得耐，提醒我哋快啲食。埋單同老板傾，發現原來佢喺東京總店做徒弟學師14年，再返香港開真•分店。*黑骨 $96豚骨湯用西班牙豬骨煲10個鐘，濃郁但唔會油膩。咸度、濃厚度、蒜泥，我通通揀普通，重口味但唔鹹，絕對可以全部飲晒，而且係我心目中第一名嘅豚骨湯。「黑骨」加入墨魚汁、黑蒜油、秘製黑醬，先飲啖湯，再撈埋黑蒜免治豬肉碎「黑玉」。整體蒜香味濃郁，但未會過於強烈，但墨魚汁味未夠特出。日式叉燒都係用西班牙梅頭豬肉，香而軟腍，但不失口感。拉麵係幼麵，用自家調配”男の氣”麵粉，有咬口，掛湯掛得啱啱好，我強烈建議揀硬。祕製炎の醬必須加！自家調配辣醬，有啲似韓式甜辣醬，1辣唔夠喉啊！豚骨 $91同一個豚骨湯底，加入豬背脂，但相比之下冇黑骨咁驚豔。溏心蛋 $15單單一隻溏心蛋充滿醬油香、蛋香，蛋黃半熟好似果醬咁，而且就就連蛋黃都有醬油香。