Lagom Kaffe (Closed)

今次又再踏足觀塘搵好野食，見到有間幾有空間感既餐廳就入去試下啦。店員好有禮貌問坐室内定室外，仲溫馨提示室外有活動，可能會比較嘈，非常體貼。餐廳坐位與坐位之間寬敞，有背景音樂，如果音樂細聲一點會更好。可以自助拎紙巾牙簽呢！平時鍾意影餐牌，呢間係QR code落單，所以無影到。見到有杯玫瑰蜂蜜手工氣酒寫住「超推薦」，所以試下。又真係大杯又好味，甜甜地啱女仔飲，不過就無咩玫瑰味。個杯好靚呀，好有feel。頭盤點了巴拿馬芝士火腿，份量比想像中多，芝士粒有成差唔多十粒，總共有三款芝士，仲用上比較貴既新鮮無花果，連餅乾同麵包都夠晒你配搭，唔錯唔錯！直得一提係三文魚上的蟹子，好新鮮食落好爽。另外點了個台灣風味牛肉千層麵，制作時間約15-20分鐘，呢個真係有驚喜！有少少台灣牛肉麵果種麻香味，但又唔會辣，千層麵唔會焗到太乾或太濕，而且有咬口，真係好啱我口味。芝士份量亦足夠。出面有啲舖頭用兩三層就算，呢到有五六層，好足料。原本好細食既我都食左好多下次想試下個台灣牛肉意粉，好期待呢！