Plato Cafe & Bistro (吳松街)

自己去開佐敦其實都係食嗰幾間，今日有地頭朋友帶咗我去童軍總會對面嘅一條橫街，原來有間西餐廳。前菜有忌廉蘑菇湯，蘑菇係水粒相，自己比較鍾意一片片嘅蘑菇，不過都不過不失正常嘅忌廉蘑菇湯。菠蘿牛肉漢堡($178): 漢堡包皮顏色係黑色嘅，但係食就食唔出有啲咩特別嘅味道，包皮香煎過所以更脆口，少少心思嘢。牛扒保留到有肉汁，而且新鮮煎出嚟仲係香脆嘅，而且配上菠蘿就冇咁油膩啦。薯條份量都好多架！BBQ汁燒豬肋骨($208): 要講吓汁嘅味道係教得幾好嘅，但但係今次嘅燒豬肋骨就好似有少少失水準，有啲位煎得比較韌，自己本身期待嘅係一切落去就可以即刻分離到嘅個種。飲品就叫咗冰果茶同埋美式咖啡，亦都正正常常，但係冰果茶唔算太甜，自己幾鍾意。總結：係呢個地段，又有一間裝修得幾好嘅餐廳其實已經好好，見到六點幾嘅時候都差唔多滿座。見到佢其實都花咗唔少心思喺裝修上面。我諗呢間餐廳比較適合一大班人食吓嘢傾吓偈，絕對可以坐得耐嘅餐廳。