熱點點心專門店

Open Now

Now Closed

今日午餐去左 熱點 點心專門店食點心。地點就喺太子站一出行一分鐘左右。座位好闊落，點心選擇都幾多，仲有豆漿。我同朋友兩個人一齊食，蝦餃燒賣有得揀兩件一籠。我地叫左蝦餃，燒賣，瑤柱菜苗餃，小梨子鹹水角，鮮蝦韭黃腸，蜂巢芋頭角，雪山叉燒包。仲叫左一杯紅棗桂圓豆漿同一杯燕麥薏仁豆漿。蝦餃皮都幾煙韌，而且蝦嘅餡嚟算好鹹。燒賣幾有驚喜，有咬口，味道剛剛好，好食。瑤柱菜苗餃，賣相好靚，瑤柱鋪滿喺面，菜苗夠軟熟，好睇亦好食。小梨子鹹水角，顧明思義，鹹水角係梨形，外皮外脆，咬落煙韌，餡唔會得肥豬肉，而且沙葛仲幾有咬口。鮮蝦韭黃腸，皮幾滑，但比一般嘅腸粉較厚，韭黃好香，而鼓油另上，唔點豉油都幾夠味。蜂巢芋頭角，同樣賣相好吸引，咬落去仲係熱辣辣，芋頭好香，份量都幾多，滿滿都係芋香，外脆內軟。雪山叉燒包，包外面甜甜地好軟熟而叉燒味都好出，咬落叉燒碎加埋叉燒醬好好食。豆漿熱飲較香濃，燕麥薏仁較清新，紅棗桂圓豆漿就多左份清甜味。