新興食家

Open Now

Now Closed

店舖採取左以前舊式嗰種賣嘢食嘅方法，而唔係畫紙仔，所以大家坐到落去可以食到啲咩完全係睇運氣。而且啲點心仲要係手快有手慢冇，真係完全好似打仗咁，手腳慢少少分分鐘都冇得食啊！不過小編唔太建議大家夏天去食，因為嗰度嘅環境比較狹窄要背貼背咁樣食嘢，真係會超級熱。🍴皇牌流沙包雖然呢度最出名嘅就係流沙包，亦都有好多香港旅遊書介紹，但個人就覺得一般。的確流沙包係非常流沙，分量亦都非常多，而且中間仲有好多蛋黃粒添，亦都唔會太甜。不過個包就相對做得比較差，唔單止有啲流沙餡係個包面到爆咗出嚟，而且流沙包個包亦都相對做得比較疊口，黐住晒啲牙。🍴懷舊糯米包唔好見佢平平無奇咁就覺得唔好食，呢一個糯米包係出奇地咁有驚喜。糯米飯既鹹淡適中，而且飯粒又乾身，糯米飯都整得好香。由於糯米包食落冇乜臘味味，反而裏面有啲豆係到，所以味道入口屬於比較清淡。🍴鵪鶉蛋燒賣鵪鶉蛋燒賣上面果塊皮晶瑩剔透，可以清楚見到裏面嘅鵪鶉蛋同下面果舊豬肉燒賣。粒鵪鶉蛋有好香嘅蛋味，而且一啲都唔老。而個豬肉燒賣方面除咗大粒之外，亦都好足料，而且亦都係食唔到有梳打粉嘅味道。🍴鯪魚釀瓜脯唔好見到佢冇咩色水咁就覺得唔好食，相反尼一個其實係最有驚喜嘅一個。