金城粥麵 (Moved) New Location

離開堂記, 好無癮咁行, 淨係想食腸粉, 咁有咩好食, 忽然師傅醒起呢間食店都話腸粉好得架喎, 於是就同好友食家"乜都放入窿"入去試一試啦!入到去都算多人, 不過兩兜友好易有位啫; 一坐底就睇下有咩好食, 先叫左兩碟腸粉, 有魚片腸粉同豬膶腸粉, 由於師傅從未試過呢度嘅腸粉所以都幾期待! 但由於試過呢度嘅雲吞麵, 所以都特意柯打番碗, 等好友食家"乜都放入窿"可以一試!等左一陣就有得食, 先試下豬膶腸粉, 豬膶又老又鞋, 一d都唔爽口, 仲有帶少少苦, 而腸粉又厚身, 口感其差, 失敗; 而魚片腸粉嘅魚片有骨, 加上幾腥, 一d都唔好味; 至於碗雲吞麵反而維持水準, 雲吞麵一碗有五粒, 雲吞唔算大粒但皮夠薄個餡都可以, 好細隻蝦仔不過就好爽口, 而麵好爽口彈牙, 煙煙韌韌好有口感, 係有少少鹼水, 湯底夠清味精唔算重, 得喎!最後唔信邪再柯打多一碟炸兩, 炸兩嘅油炸鬼又硬又韌, 好明顯係隔左幾晚, 加上腸粉本身好差, 所以成碟炸兩堪稱全枱最差, 失敗中嘅失敗!總括而言呢間食店質素真係唔算得, 除左雲吞麵可以外, 師傅大膽講句其餘嗰d係垃圾, 服務一般, 環境一般, 埋單幾多錢就唔記得左