碼頭故事 (Moved) New Location

今日去食火鍋，去左食中式火鍋，碼頭故事。嘢食同環境都唔錯。湯底叫左牛油鴛鴦鍋，食辣同唔辣都滿足到。兩個人叫唔到好多嘢食，叫左安格斯肥牛，毛肚，韭菜餃，鵪鶉旦，皇帝菜，烏東。肥牛兩個人份量算可以，幾靚仔，當然食落去都好有牛味。毛肚比較爽口，不消10秒鐘就可以食，有啲似食黑栢葉，但係唔會韌口。韭菜餃我覺得幾高質，因為食得出係真係用手包，皮好薄，用料亦都好足。鵪鶉旦都唔錯，食落去有啲蛋汁，差唔多有十幾粒咁多。皇帝菜正正常常，記住要擺落清湯度打，如果唔係好似我唔係幾食得辣嘅話，就gg。總結：嘢食質素幾好，價錢唔平唔貴，所以我覺得對得住啲食客。環境就有feel嘅，但要坐木凳仔，我覺得坐得舒唔舒服就見仁見智啦。