令和鍋物酒場

Open Now

Now Closed

令和已經食過好幾次，第一次嚟到尖沙咀分店，環境幾靚，大部份都係舒服嘅卡位。慢煮A4和牛筋非常有驚喜，完全令我諗起大阪食過好好食嘅土手燒，好入味好有麵豉香，仲要係日式煮牛筋嘅加強版，大大塊食得好過癮，雖然話係牛筋，但居然以A4和牛肉粒為主，好抵食。唐揚墨魚咀滿足到我想食大排檔炸墨魚咀嘅慾望，脆皮透薄，墨魚咀彈牙有鮮味，大大碟食極都仲有，好啱餸酒。明太子厚揚串比想像中好食好多，首先厚揚豆腐好水潤連外皮都完全唔乾，外脆內嫩有豆味。 最正嘅係個明太子醬真係超好味，惹味香濃，加左少少沙律醬同香蔥，食到停唔到口。因為啱啱朝聖過京都嘅壽喜燒名店三嶋亭，仲擔心食過返唔到轉頭，估唔到堂煮壽喜燒依然令我有幸福嘅感覺。 A4黑毛和牛大大塊油花好靚，點埋蛋汁滑得黎感覺到一定厚度，牛嘅甘香係口中化開，呢個份量同質素，分分鐘喺DONKI買仲貴，物超所值。什錦天婦羅好豐富，淨係蔬菜都有五、六款，蝦又有三隻。 粉漿唔會好厚，乾爽唔油膩。