NeNe Chicken (形點 I) (Closed)

之前試過外賣覺得都幾好味，所以今次試埋堂食，堂食嘅價錢係比外賣貴。但坐得幾舒適。韓式前菜，豆乾，泡菜，酸蘿蔔。幾開胃，差唔多食晒。試返上次一樣嘅嘢比較下，無骨初雪炸雞同韓式甜辣炸雞。分別不大，都係熱辣辣香脆肉嫩，甜辣入味，初雪好濃芝士味，未必個個鍾意。呢個泡菜芝士蛋炒飯就好大分別啦。首先因為抗疫外賣只係58蚊，堂食差唔多貴一半🙈但堂食就會用鐵板上，芝士蛋放飯側邊，即係爐邊蛋咁。外賣就芝士炒滑蛋放飯面。個人中意外賣版本😂杯凍柚子茶係最差，落得好少柚子蜜，好淡，慳皮。不過事後諗，唔知係咪野食太濃味所以咁。性價比高，會再食。