新泰東南亞餐廳 (太子集團中心) (Closed)

今日同朋友出到去尖沙咀食晚餐，知道尖咀有兩間新泰今次就去咗北京道嗰間。一入到去地方唔算大，燈光暗暗地，坐咗窗口位仲望到少少海景，都幾好feel。朋友食過尖咀嘅另一間分店，佢都話呢一間個環境比較好，可能係平日嘅夜晚所以人都唔算多。我同朋友兩個人就叫咗南瓜咖喱海鮮、印度薄餅、燒鱔、燒扇貝、兩個椰青、芒果糯米飯。我本身唔算超級鍾意食南瓜，但佢個咖喱配埋印度薄餅真係出色，非常香口濃郁嘅咖喱味由我口腔到爆發，認真唔錯。燒鱔、燒扇貝都好好食，除咗我本身鍾意食海鮮之外，佢嘅調味都幾出色，係非常適合重口味嘅人，正正迎合左我，兩樣海鮮我同朋友都讚不絕口。作為泰菜嘅愛好者，一直覺得食泰菜係一定要配椰青，佢哋先係best friend。椰青非常清甜，一飲落後就覺得好幸福。最後我已經飽到上心口，但朋友都覺得要嗌返個甜品先係完美嘅終結，於是我哋就叫咗芒果糯米飯。好彩好彩，即使好飽都頂硬上，個芒果糯米飯真係勁好味，熱辣辣嘅糯米飯仲冒緊煙，椰汁甜到適到好處，兩者配合得天衣無縫，芒果味唔算好甜但都唔錯，整體十分出色，簡直係為今日嘅晚餐畫上左個完美嘅句號。