8鍋臭臭鍋 (金巴利道) (Closed)

臨去睇演唱會，由尖咀行去紅磡途中，經過呢間長期都好多人的台式鍋物店。上次經過係星期六晚，6pm 已經要等位，最後因為趕時間食唔到…今次係星期日晚730pm，未見爆多人，最後等5分鐘就ok了。叫8鍋因為有8種鍋，每款都超多配料的。配好晒唔駛煩，一個人食都相當夠，唔夠可以散叫配料加落去。先叫一個台式奶茶，好似出面貢茶那種的包裝。味道一般，可能我唔中意太重奶味的，加上冰溶左之後就更加淡…叫左個蕃茄白豚鍋和台式麻辣鍋，連飯/粉絲，每客$108。當然比吉野家貴，但咁多料，仲要乜都有d，食款式和類別都值返。朋友的麻辣鍋要中辣，但真係唔夠辣…試完真係連鼻涕都無滴 XD！我覺得下次可以叫大辣…另外，呢個鍋多d 特別既台式配料，例如米血糕，但濕濕碎唔知去左邊…我好中意我個蕃茄鍋，夠清淡開胃，而且食到勁多菜，感覺健康。唯一的肉類是豚肉，有3-4片勁大片，肥瘦適中，好香甜。本身個鍋已經有煮好左既粉絲，但加埋配餐的粉絲就好夠飽了，吸汁一流。$108 又唔算貴，至少會約friend 黎食（但唔會約friend 食吉野家火鍋嘛）。其實坐得耐既，唔會趕你走，不過個鍋個火弱左d，一般速度食完就熄左…哈哈。