Papa Joe (Closed)

去諾士佛臺晚餐，同友人去了1號搵食，見呢間有得食墨西哥菜，幾吸引。由前菜到甜品都有好多選擇，特別在墨西哥菜式都有唔少，可以試新野！呢個5 courses好豐富，都有唔少選擇。我地點左一個5 courses set dinner，一個沙律同一個墨西哥雞肉芝士薄餅。每枱都有脆片食，個醬有啲辣，不過好開胃，脆片點醬先好食，唔係味道就有點寡。飲品方面點左紅莓汁同橙汁，兩樣都唔係好甜。藜麥沙律 - 好健康，感覺食完會瘦。冇dressing，用左生果黎調味，分別係芒果、橙、紅石榴同蜜瓜，好甜好fresh！藜麥同啲配料撈勻易入口好多。是日餐湯係蘑菇湯，攪拌過嘅蘑菇好香，田園風味。最正係個餐有兩隻蠔同sparkling wine，生蠔好鮮甜，加左檸檬汁同醋，好醒胃。Rib eye點左五成熟，好香牛味，唔會好韌。薯蓉好滑好香牛油味，creamy到可以就咁吞。好鍾意呢個雞肉芝士薄餅，個餡好豐富，有三色椒、菇、雞肉同芝士，全部都好惹味！可以點牛油果醬、sour cream同莎莎醬，仲好食！跟餐甜品有檸檬cheese cake， 不過都幾酸，同埋麻麻地啲jam。