鮨廷 (Under Renovation)

立食壽司嘅文化喺香港開始冒起，對於生活節奏急促嘅香港人，都係一個唔錯嘅選擇。企喺吧枱面前，一邊睇住壽司師傅握壽司，一邊即時品嚐，又係另一番風味。壽司選項都幾多，除左手握壽司之外，仲有軍艦，手卷，刺身丼，同埋刺身添！揀左幾款基本壽司，再揀幾款特色壽司，同埋手卷。師傅一收到單就即刻握壽司喇。師傅每件壽司都會掃上少少醬油，我完全唔洗再點任何醬油，可以即刻放入口，真係好方便。三文魚壽司嘅三文魚油脂分佈相當均勻，甜蝦亦好肥美，玉子好厚又好有蛋香。我個人特別喜歡炙右口魚邊壽司同炙帆立貝壽司，炙右口魚邊好軟滑，又有油香，而炙帆立貝外香內鮮，實在係令人回味無窮。蟹棒蟹糕軍艦真係好邪惡呀，蟹棒好甜美，蟹糕又好香。另一特色壽司係燒帶子配黑醋鵝肝壽司，原來燒帶子同鵝肝嘅味道都幾配，鵝肝唔會太濃味，依然有帶子嘅鮮甜，食依兩款壽司真係要將膽固醇括出去喇。帆立貝手卷嘅帆立貝都好足料架，由頭食到落尾都有帆立貝，唔會食到尾得返醋米飯，不錯呀。