湘蜀人家

Open Now

Now Closed

食得多廣東菜有時都想試吓啲外省菜，我尤其鍾意食水煮同酸菜系列。今日嚟到呢間餐廳見到其他人食酸菜桂花魚好似好正咁，整條魚連埋魚頭,本來都想跟佢食桂花魚，但係發現原來價錢貴一倍，估計都真係新鮮魚，慳家嘅我改食酸菜鮮魚，雖然價錢平一半，但係魚肉質素都幾好喎，而且份量都好大，鍾意佢落青麻椒，唔會死麻，而且極多酸菜同葱，成個酸菜魚非常惹味，我覺得係屬於小至中辣，怕辣嘅人可能會有啲頂唔順。另外都好欣賞佢個孜然炒山羊肉，羊肉質素幾好，味道夠鮮，都有微辣，算炒得唔油，外省嘢嚟講唔肥膩。為咗中和返個辣味，都點咗個嫩雞煨麵，面嘅份量都好大，足夠四個人分嚟食，而且又係好鍾意佢夠多菜多肉，個湯都唔會太淡嘅。食完主菜當然要加多個豆沙鍋餅，鍋餅嚟講佢算整得外脆內鬆軟，豆沙餡量適中，唔會太甜呢，上枱時熱辣辣，食埋就非常滿足啦！灣仔來講價錢都算唔錯，可能中午嚟食更加抵食，因為仲要免茶介添！