龍德樓 (Closed)

今晚屋企冇煮飯，又要買外賣返去食，見佢哋煲仔飯好似幾出名，價錢亦大眾化，凍凍地都好耐無食臘味煲仔飯。佢哋的飯是即叫即煮，可能係煲仔飯原因，熱度十足，就算拿返屋企過程都有20分鐘，都唔會覺得凍，唔需要翻丁加熱。鮑魚金蠔蝦乾煲仔飯，有2隻鮑魚及2隻金蠔，我都好似第一次食金蠔，蠔味濃郁有層次感，唔會太乾身，食落冇喳。蝦乾及銀魚乾令到個飯特別香，佢哋用料足，蝦乾算大隻。臘味鴛鴦腸煲仔飯，潤腸味道濃厚，唔會太鹹，臘肉味而不膩，提昇了飯底的味道，更有油份，感覺上材料多過飯，好足料。黃金蝦球，原先都有啲擔心炸的食物會被外賣盒整淋，但估唔到食的時候蝦球都仍然有8成左右乾身，整體油份算少，食到飯盒底都唔會油淋淋，蝦球新鮮，鹹蛋黃嘢味。2個湯水（姬松茸燉雞及杏汁菜膽燉白肺）都夠火候，我比較鍾意杏汁白肺湯，因為自己好難煲到此水平，感覺清甜滋潤。