幸福鍋 (Closed)

呢幾日天氣凍，淨係想留係屋企打邊爐！醒起前幾日經過太安樓，見到新開左一間台式打邊爐餐廳，今日又想打邊爐，就去左買佢既打邊爐套餐返屋企。原本以為要用自己的煲同埋電磁爐，點知佢係所有材料pack好曬之外，仲連個煲同埋個爐都有埋，真係拎到返屋企舖好檯，點著個爐就食得，簡直係懶人之選，食完係完全唔洗洗任何野😂😂😂我叫左澳洲牛小排 海蝦墨魚滑魚皮套餐，麵揀左寬條薯粉，湯底係桃膠人參美人鍋。牛小排好好食呀！佢唔大塊，好滑，入口即溶，又好香牛味，推薦大家食呢度既牛小排！一份係唔夠我食，好彩我醒目仲追加多一份🤪海蝦都好大隻，墨魚滑好彈牙，好食過樓下街市買嗰啲多多聲。湯底好足料，真係食到有桃膠！寬條薯粉出面比較少食到，都好滑，我都鐘意呢隻麵的口感。另外追加長蟹棒，以為得個名，點知名副其實，真心好長😂😂😂食落好鮮甜😇見到仲有另一款平少少既肥牛——美國牛板腱，於是叫埋，牛板腱係大塊啲，個人都係鍾意牛小排多啲。店員推介飲古早鮮橙茶，果然配火鍋係唔錯，可以解下油膩，加上唔太甜，比較健康。第一次打邊爐外賣返屋企，原來可以咁方便，爐都準備埋，自備個打火機就得，買黎去露營都係唔錯既選擇。