新明發食家 (川龍街) (Closed)

噚日（11-8-2019 Sun）晏晝同老公落荃灣買嘢，買完食個晏，兩個人都唔係太餓，行到嚟爸爸話好食，但咁耐以嚟，我都未食過嘅呢間。知道呢間嘢食平，就預咗環境唔會好好，入到去睇到，比心中諗嘅更差，其實都唔想坐低，但見有位就照坐啦。坐低後，店員自動拎兩杯茶同已淥過嘅筷子膠匙，放喺枱喥。睇menu，原來唔係只做茶樓嘅點心，而係重有茶餐廳嘅三文治，飲品;又有雲吞麵，包羅萬有。最後，老公要$27.00嘅鱆魚肉餅飯，加$10.00要紅豆冰。我想要糯米卷但冇，咁要$11.00嘅馬拉糕同$12.00嘅潮州粉粿。食物好快到嚟，亦熱騰騰嘅，枱上亦放有鹹，甜兩隻豉油，老公加好就食得。我就先食潮州粉粿，口感正常，味道淡，冇五香味，冇花生冇沙葛。味道:1分然後食馬拉糕，大大件嘅唔太甜，OK。味道:3分之後老公俾啲飯我試，雖然我食唔正鱆魚粒，但鬆軟嘅肉餅已經充滿鱆魚味，有驚喜;飯粒軟硬都適中啦。味道:5分最後係紅豆冰，比例好似唔錯，紅豆大粒，但可惜唔夠腍，成杯嘢唔太甜。味道:2分環境:除咗一入去感覺麻麻外，就係冷氣唔多夠。