日常素食 (Closed)

平時多肉少菜，最近識咗一個素食嘅朋友，就約佢去黃大仙嘅一間素食自助餐食個晚餐，傾吓計。氣氛環境都唔錯，地方寬敞乾淨。食物種類亦都多樣化，有壽司，沙律吧，炸物，糕點，炒飯炒麵，亦都有非常多嘅熱食餸菜等等。我好鍾意食豆腐，亦都欣賞佢哋嘅炸豆腐，香口結實，但唔油膩。香濃嘅羅漢齋同咖喱薯仔，襯托炒飯一流。飲品同樣多元化，今晚就試咗清涼香甜嘅楊枝甘露，同埋清熱解毒嘅羅漢果茶。員工不斷為蒸籠添加入面嘅甜品，試咗唔少養身嘅紅棗糕，薑汁糕，桂花糕。最後以雲呢拿雪糕配豆腐雪糕作結。我全晚都感覺唔到素食嘅單調，而我那一位素食朋友亦都好滿意呢一個自助餐，認為食到一種開始素食之後得唔到嘅感覺。非常滿足嘅一晚。