孖寶 (Closed)

好耐都冇去上水食飯，今晚揀咗一間西餐廳同朋友一邊食一邊傾偈。孖寶小館算係上水數一數二嘅西餐廳，開咗好多年，以前成日都嚟食飯。朋友叫咗一個西班牙黑毛豬架，豬架煎得剛剛好，唔會煎到硬晒，能夠鎖住肉汁，豬肉肉感軟熟，點埋黑椒汁食好入味。配埋薯仔一齊食，份量剛剛好。我叫咗龍蝦汁虎蝦意大利飯，意大利飯一上到枱熱辣辣，而且飯粒軟中帶硬，容易入口。虎蝦好大隻，而且啲肉超級彈牙，食得出係好新鮮嘅蝦。龍蝦汁都幾濃味，好似係淆咗好耐嘅龍蝦湯咁嘅味道，令人回味。