桜 (Closed)

入開元朗做野，心血來潮想食日本野，但又唔係好多時間，就決定食返平時食開既手卷店啦！平時係道就食開刺身，今次就決定唔好咁悶試下其他野食，揀左蟹將軍！因為蟹係即叫即炸既，所以都等左少少時間，終於有得食啦！成隻軟殼蟹鋪左係飯麵，仲有蟹子同蟹柳等既配料，好吸引呀，都只係$52，真係好抵！首先食一啖蟹先，岩岩炸起好熱呀，一咬落去仲有肉沖’bi’出黎，好juicy！你睇下隻蟹都幾大隻，炸到金黃色，天氣凍凍地既時候食好暖胃。飯上面都鋪滿唔少蟹子，諗住將佢同D飯撈埋一齊既時候，先發覺原來蟹既底下都鋪左好多蟹柳，令你食落個時唔會淨係得飯咁單調，加分！！蟹肉、蟹子、蟹柳，真係名不虛傳既蟹將軍！食完依個雖然都已經好飽肚，但都係忍唔住食返個刺身手卷先係最滿足！海膽三文魚子！依個組合真係冇得輸，睇下份量幾足！！一口咬落去，食到三文魚子既鹹香，再加埋海膽既鮮甜，真係回味無窮，佢既三文魚子大大粒好飽滿，而海膽有少少甘甜同creamy，唔會話細細粒食兩啖就冇，依個組合暫時係我最鐘意既！