點點心 (Closed)

平時鍾意同朋友一齊發掘下邊啲小店有好味嘅點心，於是就上網搵左呢間點點心。坐低嘅時候就同朋友一齊睇餐牌，剔點心紙。揀食物嘅時候見到附近好多食客都係遊客，心諗「呢間唔通好味到連遊客都識?」我哋叫咗一個黑松露小籠包、一個醬皇蒸鳳爪、一個糯米飯同埋一個奶皇包。好快就上菜，不過張枱真係太迫，唔可以一次過嗌咁多嘢食，如果唔係就會放唔晒喺枱面度。首先個黑松露小籠包都唔錯，打開入邊係有熱嘅湯汁，但黑松露味唔係太突出，有少少失望。而個醬皇蒸鳳爪就好似食咗一啖鹽同埋一啖味精入口，食完一件即刻好口渴，要不斷飲水，但無論飲幾多水，啲味精味好似一直係個口到都唔散。奶皇包嘅賣相一般，內饀係普通吉士醬，拎上手係暖嘅，內饀都係微暖，所以食嘅時候入面嘅醬唔係流心，而且偏甜。糯米飯都還可以，糯米煮得軟糯，再配少少蛋絲都幾香，但係始終都係味精味比較重，所以食完都係要不斷飲水。其實用膳嘅環境比較狹窄，食嘢好容易撞到隔離枱嘅食客，而且每張枱之間嘅空間唔多，食客出入都唔方便。 再加上味道真係一般，應該唔會再去食。