民華餐廳 (Closed)

是日係自租office後首次出外「見客」，有生意就邊度都去！而開工前就醫醫肚先！茶餐廳競爭好激烈， 要迎合我呢種好多工作做，事事要求快靚正的香港人，最緊要係要夠快但水準又要有。近年有個現象，好多茶餐廳主力推銷有炒蛋多士加粉麵的常餐，一般一個餐近四十蚊，已經好普遍。咁究竟點解民華餐廳嘅常餐可以咁得我歡心呢？我再三確定多次之後（之前幫襯開另一間分店），我可以好肯定咁講，因為佢嘅質素好！我揀民華最主要是被個常餐餐牌吸引，因為粉麵選擇都頗多元化。除了茄牛 沙爹牛、雪菜肉絲、榨菜肉絲、叉燒、火腿，仲有薑絲牛肉。 雞蛋同多士嘅做法都有好多款式，太陽蛋、炒蛋、熟蛋，任君選擇。今日天氣熱熱地，點了雪菜肉絲米跟炒蛋火腿。個多士面好脆，入面就軟棉棉，成塊都好厚身；牛油分量搽得剛好，唔多又唔少，非常適中，真係好正！炒蛋好滑，蛋味香濃。雪菜肉絲鋪滿米粉面，分量好多，肉絲沒有我不喜歡的「豬膻味」，味道夠濃郁。整體保持一慣水準，真心不錯，飽肚又滿足。