爆汗串串 (Closed)

之前北上深圳吃喝玩樂時見到商場有啲人圍埋一齊，一串串咁樣食小食，覺得好得意。知道香港終於都有正宗嘅四川食店「爆汗串串」，一定要試下啦。店鋪嘅裝修真係好潮好型格，座位雖少但乾淨企理。我地叫咗個麻辣串串放題，黃金時段都只係$168加一，包埋小食任食，算係幾抵食。試一試個湯底，麻、香、辣十足！店員話湯底嘅香料由成都運來，有香葉、草果、桂皮、丁香、紅花椒、印度椒、八角等十二種配料炮製。經熱油炒香，再加入豬骨、雞骨、清湯熬製，另外再加成都秘製辣椒油。除非特別指明，否則都係中辣。我當然揀中辣啦，咁先食到正宗味道。我地叫咗三輪，第一輪只需要剔，店員就會根據人數每種小食各二。我地總共食咗牛肉、牛根丸、千層肚、雞軟骨、魷魚、火腿金菇、雞柳、雞肉腸、花枝丸、魚皮餃、娃娃菜、豆卜，由肉類都蔬菜都有，配上麻辣湯底真係好入味！一路爆汗一路大叫好正！我地仲食咗爆汗牛肉麵、蒜泥青瓜、棒棒雞同鐘水餃！我地仲加咗$30，啤酒汽水任飲。我見到有最愛嘅韓國啤酒就雙眼發光，飲返幾罐都已經翻本。仲有凍豆漿，都幾解辣。食物質素幾好之外，服務員都好熱心介紹，睇得出小店用心經營。以後同朋友食飯，又多一個好嘅選擇，絕對會encore!