高木炭火鳥燒 (Closed)

尖沙咀棉登徑開左好多餐廳，午餐時間去食仲有set lunch，質素高又抵食。呢幾日行過見到間類似日本居酒屋既餐廳，一直心思思想試，今日放lunch冇咩頭緒就決定去食。呢間餐廳叫「高木炭火鳥燒」，原來名字原由係因為佢出名食串燒。set lunch有串燒定食揀，好多款燒物種類，連龍蝦都有。我揀左雞翼、帶子、准山和冬菇。套餐配埋白飯、前菜同湯。前菜係味付螺肉，湯係麵豉湯，白飯是珍珠飯。串燒午餐定食（雞翼、帶子、冬菇、准山）$98即叫即燒，串燒黎到時仲係燒辣辣脆卜卜，好香呀！雞翼係剪開黎燒，跟足日式串燒做法。帶子大隻厚肉，肉質彈牙，味道鮮甜，仲好juicy。冬菇甜甜地，應該係掃左層蜜糖，食落仲有香烤味。最驚喜係燒准山，好好味，口感林林地帶小小脆口，好特別。除了串燒餐仲有烏冬定食及蓋飯之類，選擇都幾多元化。期待下次食佢個燒龍蝦定食。