源記海鮮小廚 (Closed)

今日同朋友嚟到呢間在二坡坊嘅源記海鮮小廚，記得以前經過這裡，好似見過呢度派免費飯盒俾老人家，係一間有良心有愛心嘅飯店。我哋唔係太肚餓，只係叫咗兩個餸：源記小炒皇，蜜汁薯仔牛柳粒。可能我哋呢餐嘅晚飯時間算係早(大約6點鐘), 小菜好快就上檯。源記小炒皇份量都幾多，係蒜芯炒腰果蝦乾魷魚菜脯，輕微少少辣，呢碟餸幾惹味，有好多蝦乾非常香口，餸白飯最正。另一碟蜜汁薯仔牛柳粒，啲薯角沾咗蜜汁煮，外層脆脆哋，內裏好夠淋，牛柳粒大大粒，又係好惹味嘅一碟餸。雖然只係叫咗兩個餸，我哋都食得夠飽，最鍾意呢度嘅小菜夠鑊氣，絕對係大排檔風格。