咖啡灣 (荃灣千色匯) (Closed)

今晚約咗朋友去到荃灣嘅咖啡灣食晚餐，一去到餐廳嘅佈置已經好夢幻，係一個可以好好傾偈嘅環境，而Menu嘅設計七彩繽紛，一樣咁夢幻。有好多款嘅意粉，飯，同埋漢堡，真係諗咗好耐先至決定到食咩好，因為樣樣都想試。最後揀咗軟殼蟹黑松露忌廉意粉，加$15再加左啲芝士，因為睇電視話食芝士對身體好喎。軟殼蟹除咗搶眼之外，仲非常之入味，炸得啱啱好，唔會比意粉嘅黑松露味搶咗。叫咗個意粉，第二個主食就叫個飯啦。揀咗西班牙大佬焗豬扒飯，兩塊豬扒大大塊，但係好容易切，煮得軟身又易入口。餐廳嘅飲品非常之靚，每一杯都好夢幻，最後朋友揀咗鳳梨藍蝶茉莉花茶，我試咗一啖，都幾有菠蘿味。而我就揀咗櫻花藍蝶花，我未試過藍蝶呢樣食材，只係因為我覺得呢一杯野太靚，一定要試吓。估唔到都幾好味，而且好適合熱辣辣嘅夏天飲。