Pancake 專門紗織 (Closed)

之前經過已經覺得呢間舖頭好靚，好想入嚟試，奈何太飽。今次同朋友食完飯，仲有好多計要傾，想搵地方食完甜品先返屋企，即刻諗起呢度😊我哋一行四人，好好彩一入到黎餐廳，全餐廳最靚嗰張枱啱啱埋單，我哋即刻等佢清潔之後就坐低。餐廳環境真係好靚，好夢幻，真係好似去咗日本嗰啲Café咁。上次經過已經睇中咗佢個自選Mont Blanc pancake，pancake可以選擇原味，朱古力味，或者綠茶味。雪糕有五款可以揀，吹面頭嗰一層可以選擇栗子，紫薯，士多啤梨。我哋嘅選擇係栗子，綠茶雪糕，朱古力pancake。一上到枱當然覺得好靚，佢嘅pancake並唔係好似其他日本pancake咁好鬆軟果一種，有啲似蛋糕多啲，味道非常好，一個份量係夠兩個人食，因為都好「漏」。我朋友就接受waiter推介叫咗個培茶雪山，最底嗰層都係pancake，入邊亦都有雪糕，整體感覺其實似食緊Baked Alaska，超贊👍🏻份量都係夠兩個人食。