越一越南牛肉粉專門店 (Closed)

聖誕假期做咩好？梗係去食好嘢啦！趁住黃大仙越一越南牛肉粉專門店七周年，做緊八五折優惠，就去食越南聖誕大餐，夠特別啦！呢間舖頭真係大件夾抵食，每樣餸份量多，價錢仲好抵，叫咗六樣嘢折咗之後只係$248，就算未折都係$300有找，食得好飽好飽，味道亦都有水準㗎！海南雞飯：啲雞全部走骨，雞有雞味，多肉又新鮮，配埋三種醬料，總有一款啱心水，送飯一流。朋友減肥中，所以揀咗白飯，另外仲有熱湯奉送，朋友話都煲得好入味。炸蝦餅撈檬：炸蝦餅大大件，而且厚身彈牙，我覺得好好食。撈檬係正常發揮，好食的，我鍾意佢嘅撈檬同醬汁唔會超級勁有蒜味，食完口腔會清新啲，啱晒我，哈哈青木瓜牛肉沙律：呢碟沙律估唔到咁大碟，牛肉多，青木瓜沙律更多，非常爽口，再加埋紅蘿蔔絲青瓜絲等等配料，酸酸地，非常清熱開胃。酸辣鳳爪：鳳爪嘅份量都係好多，有十幾隻，新鮮爽口，仲有車厘茄、西芹，生菜，又係一味酸酸地同清新嘅開胃小食。飲品我哋叫咗椰青同凍青檸梳打，椰青非常新鮮，好大隻，裏面好多椰青肉，非常清熱解渴。凍青檸梳打可以有甜度選擇，我選擇咗走甜，酸酸地勁開胃，真係好好飲。