豪隍點心工房 (Closed)

有一晚放工想飲茶食點心，諗起bookmark咗觀塘呢間開到夜晚九點嘅點心店，放工去食都得。六點三嚟到，因為比較早，所以無book都即刻有位。點心紙雖然只有一張，底面兩版，但選擇都算多，基本款式點心都有，亦有蒸飯同米線揀。呢度嘅蝦餃同粉果可以一籠雙併咁嗌，每樣兩粒，兩個人一人一粒啱啱好。粉果皮口感煙，內餡材料豐富。蝦餃超大隻，蝦餃皮晶瑩剔透呈半透明狀，裡面啖啖蝦肉，爽口彈牙燒賣又係好大隻，面頭放蝦仁賣相好靚。同蝦餃一樣好多蝦肉好爽口。山竹牛肉球口感滑溜無渣，肥豬肉份量適中唔會過份肥膩。芫茜份量都唔少，鍾意食芫茜嘅我好滿意蒸腸粉揀咗牛肉腸，就咁睇樣都知腸粉皮夠薄，睇落都知好味牛肉餡份量好多，而且味道好炸嘢就只叫咗蒜蓉芝士長春卷，長春卷炸得深色咗少少。春卷餡好多爽口蝦肉，同蒜蓉芝士味道非常配合生粆糯米飯好足料而且唔會過份油膩，而且份量都好多。整體嚟講點心質素幾好，價錢平得嚟大大件。營業時間長，晚市收九點放工嚟食都趕得切。如果煎炸嘢多啲選擇會更好，例如煎薄撐、煎芋頭糕、蘿蔔絲酥餅、芋角等等。下次放工想食點心都好可能會再嚟幫襯。