夏麵館 (寶石大廈) (Closed)

上海妹定時定候都會饞吓家鄉菜，夏麵館喺好多區都有，但多數都開喺商場內，一到飯點就鬼咁多人。反而寶石大廈附近呢間可能因為近民宅，啲人多數返歸食，好好彩七點半到都有得直入。秋起蟹肥，餐廳都適時推出蟹全宴，蟹羹、蟹粉拌面拌菜炒飯炒年糕炒自己，能夠諗到嘅都喺哂餐牌。依家喺togetda仲有得11道菜矜貴蟹粉宴買一送一優惠，記得要預訂先有咖！未食全宴之前，就小試牛刀試吓佢蟹粉小籠包同菜芯；小籠包半個手掌大小，皮薄肉多，除咗喙喙果撮蟹粉，肉包內都充滿混有蟹粉嘅汁水，鮮嫩多汁。蟹粉多過菜芯，貼心地伴有薑醋可蘸點，蟹粉加咗薑碎炒，唔怕太涼，仲有絲絲蟹肉；菜芯質素好靚，冧甜無渣，一咬就斷，係調味偏重咗，單食有啲鹹，送飯送饅頭會比較好。上海涼菜一定要嗌，涼拌茄子個汁食得出溝咗蠔油、辣醬，加上茄子索哂汁，每一啖都好惹味；燻魚炸得甘香酥脆，偏多骨，但骨刺大條，尚算易食。韭黃炒鱔絲好足料，鱔段肥美大條，加埋韭黃炒更添辛香，不過同炒蟹粉一樣調味較重，宜配饅頭銀絲卷。麻醬拌麵用上剪麵，剪成段狀較易食用，用麻醬香油拌勻，麻醬略少唔夠麻香，值得一讚係麵條烹煮時間較短，保留到韌勁，食起嚟更有咬口。