Mango Tree Kitchen (太古城中心) (Closed)

有日同一個同事去太古做嘢，就喺 cityplaza 食埋 lunch，食過元朗分店，終於可以試吓太古分店～我哋叫咗香茅豬扒飯同埋紅咖喱軟殼蟹飯，另外可以優惠價配小食，不過我哋另外喺大餐牌揀咗海鮮粉絲沙律。一上枱真係嚇親，首先豬扒係大大件，攤平都放唔晒，要分兩層 😂而且仲要唔係薄薄一片，而係厚切！細食啲都真係搞唔掂......好鍾意佢啲蔥油，超香，拎少少嚟送飯真係一流～然後更震撼係軟殼蟹，有四大隻！我忍唔住講咗句「乜軟殼蟹好平架咩？！」炸得好爽口，唔油膩，正～呢個紅咖喱都唔會辣，好易入口。海鮮粉絲沙律好清新，酸酸辣辣，青口、蝦等等幾款海鮮好足料，最鍾意係啲粉絲吸晒味 😋食厭蔬菜沙律嘅話，粉絲沙律真係個好選擇！叫咗杯泰式奶茶，泰式奶茶出晒名係勁甜，都算係一大特色，我問店員如果走甜會唔會好似玩嘢咁 😂店員有求必應，結果真係幾驚喜，奶味好香好滑，好回味呀～枱與枱相隔一定超過 1.5米，餐廳夠闊落，而且做足防禦措施，食得好安心～見店員人數唔多，不過忙碌中都反應得好快，抵讚。