Fish & Chick Plus (Closed)

2年前，我哋偷轉機時間，閃遊倫敦8小時，話晒係M佬第一次去英國，除咗去大笨鐘之外，最重要就梗係要食Fish and Chips啦！但自從嗰次之後，我同M佬有食過薯條，但就好似再無食過炸魚。今日回顧番當年嘅旅程，不如順便回味當年嘅味道啦！去英國又未免太遠，一於去住觀塘嘅Fish & Chick Plus頂住檔先啦！炸蟹肉球沙律：蟹肉球炸到脆卜卜，咬落去食到絲絲蟹肉，炸皮唔厚，感覺特別；至於沙律菜夠晒新鮮。蘑菇湯：蘑菇味濃郁，最緊要入口夠滑，好味道。白酒汁煮鮮蜆：粒粒蜆都好大粒，好豐滿，仲要索晒啲白酒汁，微辣但好鮮味。傳統英式炸魚配薯條-石頭魚：炸石頭魚又厚又大件，真係成隻手掌咁大呀！肉質紮實又唔嚡口，炸皮香口鬆脆，無雪味，而最重要係一啲都唔腥。而個tartar sauce同個魚夠晒match！至於薯條夠晒長又夠粗，自己落少少鹽調味，薯味濃郁！自家製龍蝦汁大蝦長通粉：原隻大蝦又新鮮又彈牙，而長通粉嘅軟硬度啱啱好，唔硬又有彈性，索晒啲濃郁嘅龍蝦汁，好好味。