Grill'er 石燒扒專門店 (Closed)

今日去咗喺大圍嘅Gill’er石燒扒專門店，新開張冇耐但已經係當區人氣食店。 咁嘅市道都仲要等位，真係好旺場呀！餐廳門口有自動售票機，揀啱想食嘅扒就入錢買票俾店員就可以入座。呢度以半自助形式用餐，可以無限添加沙律、湯同飯。沙律係【蔬菜沙律】，有椰菜、生菜、粟米、青瓜、番茄仔等，沙律醬料自己落。湯係【牛尾湯】，熬足九個鐘㗎，好好飲，我飲咗三碗～食完個扒再飲多一碗添！【白飯】亦係任裝，想冇咁齋可以落拌飯素。【美國黑安格斯肉眼400g $218】牛扒係放喺一塊超高溫燒到㷫嘅熱石板上面，出嚟嗰陣係一成熟。 店員教路，先每邊煎30秒，然後就切開按自己喜好調校生熟度。 黑安格斯肉眼脂肪豐富，煎嗰陣啲油流出嚟，香味四溢。 切第一件放入口，油香肉香迸發，好邪惡但好鬼正。 塊扒又大塊又厚，大滿足！另一份係【風乾熟成(28日)美國帶骨肉眼280g $338】，相比黑安格斯肉眼脂肪冇咁豐富，但肉味就更濃郁，各有千秋。 呢款就適合蘸醬汁，醬汁都係自助，有芥末、燒汁、黑椒汁等等，我覺得呢度嘅黑椒汁特別好味，不妨一試。石燒嘅好處就係自己鍾意幾熟就幾熟，甚至一塊扒自己由生試到熟都得，加上啲扒都幾高質，會再嚟嘅～