金龍冰室 (Closed)

同老公係大圍買完野落街食飯，諗食咩真係好頭痕，其實最緊要咩都有得揀同經濟實惠。咁就決定去茶餐廰。見金龍冰室裝修乾淨整齊，餐牌一大本慢慢揀岩晒我地。叫左是日晚餐套餐$55有湯，豬扒炸蝦配3.6牛乳炒蛋跟薯菜，仲有焗車打芝士碎蛋沙律朱仔飽，仲有野飲，勁抵！！老公叫左鐵板扒餐$90有湯，龍蝦汁牛仔骨配炸蝦炸帶子跟薯菜同野飲，仲加左碟油菜。紅湯好味唔會酸，白湯足料，油菜好快上，超級驚喜因為出街食真係未見過咁大碟菜，又新鮮又靚：）豬扒set 都幾好，豬扒夠入味不過唔夠熱，可能因為上面有沙律菜涼左，老公個鐵板滿到呢...牛仔骨好嫩滑又大件，非常飽肚，飲埋杯檸茶就岩岩好。下次再黎試其他野先。