在家居酒屋 (Closed)

星期五晚唔想喺屋企食飯，上OpenRice抄屋企附近食肆，睇到呢間居酒屋食評唔錯，仲有牛腸鍋食，所以就一於扑鎚訂位喇！我哋七點半準時到餐廳，好睬有訂位，如果唔係可能真有排等。侍應安排我哋坐在牆邊位，望住一排日本清酒，非常有居酒屋feel。阿仔一向鍾意食日本餐，而我本來想食壽喜燒，但係睇到呢度有牛腸鍋，所以就轉咗軚，畢竟牛腸鍋唔係度度食得到。老實講，佢哋餐牌唔算豐富，阿仔就揀咗啲叫做唔係咁常見嘅嘢，當然亦有叫咗碗佢哋出名嘅旋風don。首先上嘅喺兩隻廣島蠔，坦白講，無乜特別，但蠔肉都叫豐滿，38蚊一隻，一啲都唔平。跟住上嘅喺阿仔最鍾意嘅魷魚筒。因為魷魚筒有醬汁，如果就咁食可能會有少少咸，好在同時又上埋鰻魚飯，魷魚伴埋飯食即刻變成非常好味，有咬口。咁啱兩個菜式都俾咗半粒酸柑，酸柑汁吊起味道，亦令到滑蛋鰻魚飯變得更有層次感。之後阿仔又嗌咗安康魚肝，平時一向食開豬、牛、鷄、鵝肝等，今次食魚肝，都叫做特別，味道唔錯。我哋一向大食，即然要食嘢就食夠去。因為想食海膽，就要咗個吞拿魚腩碎海膽卷。一碟有六件，味道不過不失，叫做食得過啦！最後上嘅喺我期待嘅牛腸鍋。呢個鍋應該係間餐廳嘅名菜，見到好多人都有嗌。