麵屋 元祖達摩 (Closed)

放工約了朋友到大埔就試試新開的拉麵達摩拉麵，第一碗係達摩辛辣拉麵，三種辣度之中揀咗中辛，濃厚豬骨湯底本身口感夠滑口，而加上自家調配嘅辣醬料中辣程度亦好夠喉。豚肉係西班牙黑毛豬上肩，脂肪比例均勻，食起上嚟比較冧身，容易嘴嚼，不太肥膩。拉麵嘅麵質幼滑，水準好好。 另一碗拉麵係北海道3.6牛乳黑松露松葉蟹肉拉麵，係店內期間限定。湯底牛奶味道非常濃郁，喜歡飲牛奶嘅人可以值得一試，另外松葉蟹肉好新鮮，本身味道不重，但配搭上黑松露的效果就做到剛剛好，仲有菇、豚肉同粟米，非常足料。所有拉麵都有得自選不同制法，可以自己揀麵硬度、湯濃度、配料、追加等。 額外叫咗兩款小食，分別係日式芝士南瓜薯餅同埋紫薯甘栗薯餅。呢兩款薯餅都好足料，芝士味道不太咸，加上南瓜帶點甜，令薯餅不會太膩和太飽滯。紫薯近年大熱食材，配合粒狀甘栗，令口感豐富而又唔會黏口，薯餅外皮又炸得夠薄身，整體做得好好食﹗如果怕太熱氣，亦有沙律醬可以沾。 飲品就點咗達摩梳打同招財貓梳打，兩款汽水個樽身都好靚，味道同一般波子汽水差不多，招財貓梳打係偏淡黃色，其實係蜂蜜炭酸梳打。